giornata mondiale dedicata all'acqua

Abbiamo dedicato una festa all'acqua e nell'occasione abbiano scritto e recitato uno spettacolo teatrale con la storia di un paese che è nato solo per merito dell'acqua. In questa occasione ne riproponiamo l'introduzione.  http://www.unwater.org/worldwaterday/

Guera del fogo!

Guera del pan!

Guera de l’oro!

Guera del petrolio!

Guera de l’àqua!

Ma quaea guera, no so cuà par descorere de guera ma de 800 ani de Bataje!

800 ani de Bataje!

De cossa xeo fato un paese?

De case, de strade, de ponti, de cése, paeasi, fabriche e, de sàngoe: carne e sàngoe!

Parché xe ła carne e el sàngoe, overo ea xente che fa e case e strade e tuto queo che ghe xe in un paese! Ma el proverbio dise: de merda e àqua santa ghe ne vol sempre tanta! E desso no savaria dirve come che ła xe ła merda, ma de serto l’àqua xe santa!

Cuà no ghe xe sta l’età de bronzo, de fero o preromana o romana, cuà ghe xe sta soeo età de l’àqua!

Aqua Negra, Bisato, Cioare, Gorghissolo, Paltana, Palù, Rialto, Rivea, Sabion, Scoeo Canea, Seriola, Canae Vigenson, Fossi, Bote, Botesina, Conca, Pescheria, Squero. Tuti loghi de àqua, tuti posti de sto paese!

Cualche ano fa xe sircoeà na notisia sientifica. Un sienziato ga dito che l’àqua ga memoria. Se l’àqua querse na roba, na forma, ea sea mena in memoria. Me piaseva sta roba cuà, me recordo chel dì, son dà sora al ponte dei scaini e go vardà l’àqua, gavevo dei sasseti e i go butà, uno tre secondi drio chealtro e go visto tute e Bataje che xe passà in 800 ani. El sercio se slargava e drento ghe ne nasseva n’altro e n’altro e n’altro. Tuti distanti compagni e tuti che finiva in coste ai cuarei dea mura. Mi vardavo drento chéi sérci e go visto ea storia de sto paese, e face che ło ga fato. Face de àqua, face lisie o increspà de grinse, face umiłi de àqua. Xe sta mejo che vardare ła tełevision. Dovevo gavere un muso da mona co go tirà su i oci. E me so sentio de pì mona co go sentio contare che ła teoria del siensiato ea iera na casada. Ma mi ea go vista, mi mea ricordo ea storia che go vardà drento el canae e se voì, vea conto ea memoria de l’àqua!  Voìo che vea conta o che vea diga?